[فيديو] ماذا بعد صعود منتخب مصر لكاس العالم (روسيا 2018)؟
مصر تحقق المعجزة وتصعد إلى كأس العالم !
جملة تستحق الاحتفال
انا فرحان وفي نفس الوقت مستغرب بصراحة
فعلًا صعود منتخب مصر اللي كسب الكونغو بالعافية في مباراة هتحدد مصير صعودنا لكأس العالم بعد غياب 28 سنة مش عارفين نصعد نكسب بضربة جزاء في الدقيقة 94 على أرضنا وفي وسط جماهيرنا
ومنتخب النجوم اللي كان مع حسن شحاته اللي كسب ايطاليا وكان هيتعادل مع البرازيل في كأس القارات مايصعدش
حقيقي دي معجزة
وفي وسط موجة المشاعر المختلفة من فرح وعياط وزغاريط وشماريخ ، واحتفال كل واحد بطريقته الخاصة
نسأل سؤال : ماذا بعد الصعود إلى كأس العالم ؟
يعني ايه السؤال ده ! المهم اننا اتأهلنا ودخلنا كأس العالم دي جت بعد شوقة يا جدع وفكينا النحس الحمدلله
الموضوع عامل بالضبط زي طالب مش بيدخل الامتحانات وأهله بيتحايلوا عليه يدخل ولما دخل في أول لجنة أهله فرحوا به وعملوله زيطة وزمبليطة (واد يا لمبي) مع ان المفروض الزيطة دي تتعمل لما تطلع النتيجة ويجيب درجة عدلة في الامتحان !
لأن دخولك الامتحان المفروض انه أمر بديهي
فاحنا محتاجين نفكر احنا نعمل ايه بعد ما صعدنا ؟
ودي مش مشكلة المنتخب لوحده وخلونا ننقل الكلام من المنتخب لك انت لاننا مشكلتنا كشعب وكأفراد اننا دايمًا شايفين الصخرة اللي معطلانا ومش بنشوف ايه اللي بعد الصخرة دي، ووقت لما ربنا بيكرمنا ونحطم الصخرة دي!!!
بنتنح لاننا مش عارفين هو ايه بقى اللي المفروض يتعمل؟
وعشان كدة دائمًا بنحبط لاننا مش بنفكر فيما بعد ؟!
واحب انقلك نقلة سريعة كدة
عن أكثر دولة وصلت لنهائيات كأس العالم بحوالي 8 مرات
وهي الحقيقة مش دولة واحدة ولكن هما اثنين :
البرازيل وألمانيا
ولكن بما أن البرازيل اتغلبت من ألمانيا في كأس العالم اللي فات 7-1 على أرض البرازيل وفي وسط جماهيرها، فاحنا هنتكلم عن ألمانيا
منتخب ألمانيا أخذ كأس العالم في تاريخه أربع مرات
آخر مرة في 2014 وأول مرة في 1954
وبما اننا عاصرنا كأس العالم اللي فات فانا مش هتكلم عنه وخلونا نتكلم عن أول مرة ألمانيا تاخذ كأس العالم !
سنة 54 دي يعني بعد الحرب العالمية الثانية بحوالي 9 سنين بس، واللي مايعرفش غير معلومات قليلة عن اكثر الحروب دمارًا في البشرية يبقى أحب أقولك انك فايتك كتير
الحرب العالمية الثانية هي حرب شمولية ونزاع دولي مدمر بدأ في 1937 وانتهى في عام 1945 وشاركت فيه قوات مسلحة من سبعون دولة شاركت في معارك جوية بحرية و أرضية
وأكثرها كُلفة في تاريخ البشريةً فقد قتل بسببها حوالي 60 مليون نفسٍ بشريةٍ بين عسكري ومدني، أي ما يعادل أكثر من 2% من تعداد سكان العالم في تلك الفترة
يضاف إلى هذا العدد عشرات الملايين من الجرحى والمشوهين
والحرب العالمية كانت ما بين:
ألمانيا وشركاؤها إيطاليا واليابان في المحور
ضد بريطانيا والاتحاد السوفييتي والولايات المتحدة والحلفاء
وكانت النتيجة هي هزيمة المحور أمام الحلفاء
وألمانيا هُزمت هزيمة ساحقة في الحرب دي وخسائر ألمانيا لوحدها تبقًا لدراسة أجرتها شركة متلايف 3.250.000 إنسان من العسكريين فقط
وفيه دراسة ثانية للمؤرخ الألماني بوركهارت موللر
بتقدير للخسائر البشرية للحرب بحوالي 4 مليون
ولكن فيه دراسات أخرى تصل إلى 7 مليون إنسان
ده غير البنية التحتية اللي اتدمرت أكثر من 60 % منها
ده بالاضافة إلى العقوبات والشروط اللي تم فرضها على ألمانيا من دول الحلفاء
ده غير المديونية اللي كانت على ألمانيا لانها في الآخر
هي اللي حاسبت على المشاريب في الفيلم ده
ده بالاضافة أن ألمانيا اتقسمت بعد الحرب لألمانيا الغربية وألمانيا الشرقية
وبعد 9 سنين بس من كل الدمار ده
ألمانيا مش بس تدخل كأس العالم، ولكنها تاخد كأس العالم
احنا الحمدلله على الرغم من اوضاعنا الكثيرة السيئة واللي من سيء إلى أسوأ
التاريخ بيعطينا أمل في بكرة ان مهما كانت اوضاعنا سيئة نقدر نصنع الفارق وننجح
والفرق بيننا وبينهم انهم كانوا (رجالة وواقفين وقفة رجالة) فعلًا هي دي أفضل وصف للموقف لناس عارفين بالظبط ازاي يقدروا ينجحوا ويتغلبوا على مشاكلهم وشمروا وبدأوا، انما احنا غرقانين في المشاكل ومش عارفين نخرج منها
والنجاح مش بس إرادة وتخطيط
ولكن فيه حاجات تانية هي اللي بتشكل منظومة النجاح أهمها السعي والكفاح